ராக்கெட்

ஊரில் வரிசையாக ஃப்ளக்ஸ் பேனர்களைக் கட்டி வைத்திருக்கிறார்கள்
எங்கள் பள்ளியில் படித்தவன்தான் முதலிடம் என்ற
பதாகைக்கு பக்கத்திலேயே
இன்னொரு பள்ளியில் படித்து
கலெக்டராகிவிட்டவனின் விவரங்கள் இருக்கின்றன
முச்சந்தியில் இருக்கும் இன்னொரு பள்ளியில் படித்தவள்
ராக்கெட் விஞ்ஞானி ஆகிவிட்டாளாம்
அவர்களும் ஒரு பதாகையை நட்டு வைத்திருந்தார்கள்
இப்பொழுதெல்லாம்
விதவிதமான அளவுகளில் உள்ளூரிலேயே அச்செடுத்து தந்துவிடுகிறார்கள்
ஒவ்வொரு பதாகையாகக் காட்டியபடியே
நடுமண்டையில் கொட்டிக் கொண்டிருந்தாள் அந்த அம்மாக்காரி
தனது மகனை கலெக்டராகச் சொன்னாள்- அவன் அழுதான்
முதல் மதிப்பெண் எடுக்கச் சொன்னாள்- கண்களைக் கசக்கினான்
ராக்கெட் விடச் சொன்னாள்- போடி என்றான்
ஒவ்வொரு பதாகைக்கும் ஒரு கொட்டு.
பொறுத்துப் பொறுத்துப் பார்த்தவன்
புடைத்த தலையைத் தேய்த்தபடியே ட்ரவுசரைக் கழட்டி
ராக்கெட் விட்டான்
கலெக்டரானவனும் முதலிடம் பெற்றவனும் நனைந்து கொண்டிருந்தார்கள்
எனக்கும் ஆசையாகத்தான் இருந்தது
பரிசுகளை வழங்கிக் கொண்டிருந்த தாளாளர்கள்
மிக உயரத்தில் இருந்தார்கள்
அத்தனை உயரத்தை அடைவது சுலபமானதாகத் தெரியவில்லையாதலால்
ஜிப்பை மேலே இழுத்துவிட்டு வந்தேன்
பையன் சிரித்துக் கொண்டிருந்தான்.