யூகம்- மூன்றாம் நதி

மூன்றாம் நதி நாவலை வெளியிடுவதற்கான ஏற்பாடுகளை ஆரம்பித்துவிடலாம். ஆளாளுக்கு வெளியீட்டு விழா, விமர்சனக் கூட்டம், விருது விழா என்று ஆரம்பித்துவிட்டார்கள். நல்லவேளையாகத் தேர்தல் வந்து எல்லோரையும் திசை மாற்றிக் கொண்டிருக்கிறது. இந்த இடைவெளியில் புகுந்து நம் புத்தகத்தின் பெயரை பிரபலமாக்கி விட்டுவிட வேண்டும். சேக்காளியைத் தவிர வேறு ஒருவராவது ‘செமயா ப்ளான் பண்ணுறாண்டா’ என்று காதில் புகைவிட்டால் அதுவே மிகப்பெரிய சந்தோஷம். 

ஜூன் மாதத்தின் புத்தகக் கண்காட்சிக்குள் புத்தகத்தைக் கொண்டு வந்துவிட வேண்டும். அட்டை வடிவமைப்பு வேலை முடிந்துவிட்டது. இன்றுதான் வந்து சேர்ந்தது. அட்டகாசமாக வடிவமைத்துக் கொடுத்திருக்கிறார். யார் வடிவமைத்திருக்கக் கூடும் என்று யூகம் செய்ய முடிகிறதா என்று பாருங்கள்.

கிட்டத்தட்ட புத்தகத்திற்கான அத்தனை வேலைகளும் முடிந்த மாதிரிதான். வழக்கம்போலவே ஜீவகரிகாலன்தான் ‘மெதுவா பண்ணிக்கலாங்க’ என்று தாளித்துக் கொண்டிருக்கிறார். நமக்கென்று பதிப்பாளர் வந்து வாய்த்திருக்கிறாரே! மற்றவர்களுக்கெல்லாம் கண்ணும் கருத்துமாக இருப்பார். என் நெற்றியில் மட்டும் இனாவானா என்று எழுதி ஒட்டியிருப்பதால் அவ்வளவு அசிரத்தை. இந்த வாரம் சென்னை செல்லும் போது காதுக்குள் சுடுதண்ணீரை ஊற்றி சுறுசுறுப்பாக்கிவிட்டு வரலாம் என்றிருக்கிறேன்.

வடிவமைப்பாளரை யூகித்துவிட்டீர்களா? அட்டை வடிவமைப்பைச் செய்தவர் யாராக இருக்கும் என்று கண்டுபிடிப்பது ஒரு போட்டி. சரியாக யூகிக்கும் ஐந்து பேருக்கு நாவலின் பிரதியை என் செலவில் அனுப்பி வைக்கிறேன். ‘அய்யோ அனுப்பி வெச்சுடாத’ என்று பயப்படவெல்லாம் வேண்டாம். சிரத்தையுடன்தான் எழுதியிருக்கிறேன். மோசம் போகாது. 

அட்டை வடிவமைப்பாளரை நூறு பேர் சரியாகக் கணித்தால் எப்படி ஐந்து பேருக்கு மட்டும் புத்தகத்தை அனுப்ப முடியும்? நூறு பேர்களின் பெயரையும் ஒரு தாளில் எழுதி குலுக்கிப் போட்டு எடுக்கலாம். நிஜமாகவேதான்! சீட்டை யார் எடுப்பது என்று இப்பொழுதே கேட்கக் கூடாது. காஜல் அகர்வாலாகவும் இருக்கலாம். இலியானாவாகவும் இருக்கலாம். 

இந்திய நேரப்படி ஏப்ரல் 15, 2016 மதியம் மூன்று மணி வரை அவகாசம். நிசப்தம் தளத்திலோ ஃபேஸ்புக்கிலோ பின்னூட்டமாக எழுதலாம். சரியான விடை எழுதியவர்களை மட்டும் வடிகட்டி குலுக்கி எடுத்துவிடலாம்.

கேட்க மறந்துவிட்டேனே! அட்டை வடிவமைப்பு எப்படி இருக்கிறது?